» » СNPC мұнай компаниясы ҚазҰУ-мен серіктестік орнатады

СNPC мұнай компаниясы ҚазҰУ-мен серіктестік орнатады

 Әл-Фараби атындағы Қазақ ұлттық университетінің Басқарма Төрағасы – Ректоры Жансейіт Түймебаев ҚХР-дың СNPC мұнай компаниясының Орталық Азия және Қазақстандағы президенті Бянь Дэчжимен кездесу өткізді. Жүздесуде тараптар ынтымақтастықты дамытуға келісіп, бірқатар ұсыныстарды ортаға салды.  

 

Ректор құрметті қонақты университет жетістіктерімен таныстырып, қытайлық жоғары оқу орындарымен әріптестік байланыстардың жүйелі жолға қойылғанын атап өтті.

 

«Әл-Фараби атындағы ҚазҰУ-да ғылымға ерекше көңіл бөлінеді. Бүгінде университет ғалымдары 100 инновациялық жоба әзірлеп шықты. Қазіргі таңда ғылыми жобаларды ілгерілету және коммерцияландыру бағытында жұмыстар жүргізілуде. ҚазҰУ қалашығында Samsung, Hewlett-Packard, Cisco, Коnіса Minolta, Fujitsu, Alcatel, Microsoft, «Касперский зертханасы», Huawei және т.б. жоғары технологиялық компаниялардың сертификаттау орталықтары, институттары мен академиялары орналасқан. Бүгінде ҚазҰУ ҚХР-дың 43 жоғары оқу орнымен серіктестік орнатты. Университетте Қытайтану кафедрасы мен Конфуций институты жұмыс істейді», – деді ректор.

 

Сөз соңында Жансейіт Түймебаев құрметті мейманға «ҚазҰУ-дың 100 инновациялық жобалары» атты кітапты сыйға тартып, университет базасында CNPC компаниясының кеңсесін ашуды ұсынды.

 

Өз кезегінде Бянь Дэчжи мырза жылы қабылдағаны үшін университет ректорына алғысын білдіріп, өз ұсынысын ортаға салды.

 

«Әл-Фараби атындағы ҚазҰУ – Қазақстандағы көшбасшы университет. Алдағы уақытта ҚазҰУ-мен тығыз қарым-қатынаста болып, серіктестікті арттыруға дайынбыз. Сонымен қатар Қытай мұнай университеті ҚазҰУ-мен серіктестік орнатқысы келеді. Аталмыш университет ҚХР-дағы мұнай саласында маман даярлайтын бірден-бір жетекші жоғары оқу орны болып табылады. Екі университет арасындағы серіктестік алдағы уақытта бірлесіп кадр даярлауға және қосдипломдық білім беру бағдарламасын жүзеге асыруға сеп болады», – деді Бянь Дэчжи.

 

Жүздесу соңында қос тарап аталған ұсыныстарды жоспарлы түрде іске асыруға уағдаласып, естелік сыйлықтармен алмасты.

 

Әл-Фараби атындағы ҚазҰУ-дың

 

Баспасөз қызметі

 

8-727-377-31-48

 

e-mail: farabipress@gmail.com

 

 

 

        

 


07 сәуір 2023 г. 13 143 0

Жаңалық тізбесі

Армысың, әз-Наурыз!

20 наурыз 2023 г. 11 937 0

Жаңалықтар мұрағаты

«    Наурыз 2024    »
ДсСсСрБсЖмСбЖс
 123
45678910
11121314151617
18192021222324
25262728293031