Мамандық таңдауда қателеспеу керек
«Нұр Отан» партиясының бастамасымен өмірге жолдама алған және өңір-өңірде ретімен жүзеге асырылып жатқан «Сәтті қадам» партиялық жобасы талай жастың болашағына жарқын жол ашып бергенін айта кеткен жөн. «Нұр Отан» партиясы Қапшағай қалалық филиалы да ортақ істен шет қалмай, партиялық жоба аясында нақты шараларды жүзеге асыруда. Күні кеше «Жақсы мамандық – жақсы жұмыс» тақырыбында қалалық мәслихат депутаттары мен үлкен өмірге енді қанат қағып отырған жастардың кездесуін ұйымдастырды.
Жастардың мамандық таңдауда қателеспеуін және меңгерген мамандықтары бойынша табысты қызмет етуін қамтамасыз ету мақсатында өткізілген шараға «Нұр Отан» партиясы Қапшағай қалалық филиалының қызметкерлері мен қалалық мәслихат депутаттары Мәди Темірәлиев, Ерлан Қашағанов және жастар қатысты.
Жас мамандарға жол сілтеп, өмірдегі көрген-білгенімен бөліскен қалалық мәслихат депутаты Мәди Темірәлиев:
– Партияның «Сәтті қадам» жобасы аясында бірнеше бағытта жұмыстар атқарылып, жастарды тұрақты жұмыспен қамту мәселесімен ғана емес, сондай-ақ олардың өздеріне қолайлы мамандық таңдауына кеңес беру, тәжірибесі бар маман иелерімен кездесулер өткізіп, үлгі-өнеге көрсетуді де жүзеге асырудамыз.
Жастардың дұрыс бағыт таңдап, бүгінгі күннің сұранысына сай мамандықты игеруі – олардың өмірлеріндегі ең маңызды істердің бірі әрі бірегейі. Себебі таңдаған мамандық – өміріңнің негізгі бөлігі, тұрмысыңның тірегі болады. Қала жастары бұл мәселеде пысықтау болғанымен, заманға сай қажетті мамандық таңдауда екінің бірінің жолы бола бермейтіні тағы бар. Бізге бүгінде технология мен сандық-цифрлық құрылғыларды жақсы меңгеріп, біліктілік пен ептілікті серік еткен жігерлі жастар қажет», – деді.
Партияның Қапшағай қалалық филиалының қызметкері Ілияс Байбөріновтің айтуына қарағанда, партия филиалы жергілікті оқу орындары және кәсіпорындармен өзара ынтымақтастықтағы қарым-қатынас орнатып, «Сәтті қадам» жобасы аясында колледждер мен жоғары оқу орындары түлектеріне тәжірибеден өтуге, кейін жұмысқа орналасуға көмектесіп келеді. Осылайша, көптеген жастың өмірден өз орынын табуына жағдай жасаған және мұндай игілікті іс алдағы кезде де жемісті жалғаса бермек.
Тоқетерін айтқанда, партия жастарды жұмыспен қамтуды үнемі назарында ұстайды, әрбір мектеп бітірушінің тағдырына алаңдап, тиісінше көмек көрсетеді. Биылдың өзінде қалалық партия филиалының ықпалымен Қапшағай көпсалалық колледжінің 7 студенті тұрақты жұмысқа орналастырылыпты.
– Биылғы басты жаңалықтың бірі – ҰБТ тапсырмаған түлектер кәсіптік-техникалық білім беру ұйымдарына қалаған мамандықтары бойынша оқуға түсе алады. Техникалық кәсіптерге оқыту тегін. Бұл – «100 нақты қадам» Ұлт жоспарында да айтылғандардың жүзеге асуының нәтижесі.
Қазіргі кезде елімізде техникалық кәсіптер бойынша мамандар даярлау – өзекті мәселелердің бірі. Бүгінгі жиынымыздың да басты мақсаты маман тапшылығын болдырмау екендігін ескеріп, осы жаңалықты да айта кеткенді жөн көрдім, – деген Қапшағай қалалық кәсіптік колледжінің директоры Болатбек Қажиахметұлы орта кәсіптік білім беру саласындағы өзгерістер туралы жан-жақты баяндады.
Жастар тарапынан мемлекеттің жастар саясатына қаншалықты көңіл бөлетіндігі, жас мамандарды тұрғын үймен қамту және «Дипломмен – ауылға!» бағдарламасының жүзеге асырылуы жөнінде сұрақтар қойылып, тиісті мамандар олардың барлығына жауап қайтарды.
Болат АБАҒАН,
Алматы облысы
