Көкірекбаев жыл сайын 10 ауылды көркейтуді ұсынды
Жамбыл облысының әкімі Кәрім Көкірекбаев аймақтағы 10 ауылды «Туған жер» бағдарламасы бойынша кешенді түрде көркейтуді ұсынды.
Өткен аптада К.Көкірекбаев Мойынқұм ауданында іс-сапармен болғандығы белгілі. Іс-сапар барысында облыс басшысы аудандағы Елбасымыздың «Рухани жаңғыру: болашаққа бағдар» бағдарламалық мақаласы аясында жүзеге асып жатқан іс-шаралармен танысты: - «Рухани жаңғыру» түптің түбінде барлық саланың, тұтас еліміздің жаңғыруына алып келеді. Міне, Елбасы ойларының тереңдігі де, көрегендігі де осында, - деді аймақ басшысы.
Іс-сапар аясында облыс басшысы келесі жылдан бастап Жамбыл облысының 10 ауылы «Туған жер» бағдарламасы бойынша көркейтілетіндігін айтты. Оның айтуынша, әр ауданнан бір ауыл таңдалынып, сол ауылдардан шыққан кәсіпкерлер, қалталы азаматтар, сонымен қатар, инвесторлар бірігіп туған жерлерін көркейтуге атсалыспақ. Бұл жобаны жүзеге асыруға бюджеттен бір тиын жұмсалмайтындығы да белгілі болды.
Жобаның мақсаты - облыстағы ауылдарды қазіргі заманға сай дамыту.
Бұл жоба бойынша бағдарламаға енген ауылдарға жаңа көшелер, саябақтар, спорт алаңдары салынып, әлеуметтік нысандарды күрделі жөндеуден өткізу жоспарлануда. Сонымен бірге, ауыл көшелерін жарықтандыру, сәулеттік көркін жақсарту және тағы басқа кешенді жұмыстар атқару көзделуде.
Жамбыл облысында аталған жобаны жүзеге асыру басталып кеткендігі де белгілі болды. Қазіргі уақытта жобаға Мойынқұм ауданынан Кұмөзек ауылы, Талас ауданынан Ақкөл ауылы еніп отыр екен. Қалған 8 ауыл жақын арада анықталмақ.
