Ешкім жұмыссыз қалмайды
Жаңа оқу жылы жақындап қалды. Білім саласындағылар жаңа маусымға дайынбыз дегенімен, әредік болса да білім ошақтарына, оқуға қатысты мәселелер көрініс беріп қалатынын жасыруға болмайды. Соның бірі – Жамбыл ауданындағы Қайназар орта мектебінде орын алып, ұстаздар қауымының орынды алаңдаушылығына себеп болған жағдай. Мұндағы түсінбестік – ауылда жаңа білім ошағының салынуына және оған жаңа басшылықтың тағайындалып, мұғалімдер іріктеліп жатқанына байланысты екен. Осыған орай ескі мектептің жабылатындығы және ондағы ұстаздардың жұмыссыз қалатындығы жайлы алыпқашты әңгіме жүзге жуық маманның мазасын май ішкендей етіпті.
Сенбі күні мәселенің түйінін тарқату үшін Қайназар орта мектебіне Алматы облысы әкімінің орынбасары Жақсылық Омар келіп, ұстаздармен кездесті. Мектеп мұғалімдерінің алаңдаушылығын тудырған жағдайдың анық-қанығын білу үшін әкім орынбасарымен бірге облыстық Ішкі саясат басқармасының басшысы Рүстем Алпысбаев, облыстық білім басқармасы басшысының орынбасары Майгүл Омарова, аудан әкімі Жандарбек Далабаев, аудандық білім бөлімінің басшысы Ләйләш Бәкірова да осы жерге жиналды.
Мектеп директоры Тұйғынай Күшенованың айтуынша, білім ошағында 85 адам жұмыс істейді, олардың ішінде 69 мұғалім бар. Оқушы саны – 600 бала. Қазіргі кезде осы ұстаздардың барлығын алдағы жаңа оқу жылы басталғанда жұмыссыз қаламыз ба деген алаңдаушылық мазалайды. Өйткені осы ауылда салынып жатқан 600 орындық жаңа мектептің құрылысы қыркүйекке дейін аяқталады. Мұғалімдер қауымының естуінше, ауылдағы оқушылардың барлығы сонда ауысады. Себебі осы жылға дейін қызмет етіп келген ескі мектепте сапалы білім алуға жағдай жоқ деп анықтапты тиісті орындағылар. Мектеп ғимараты білім беруге бейімделмеген, тым ескі, сыныптар тиісті деңгейде жабдықталмағандықтан бұл қадамды дұрыс деуге де болады. Дегенмен осы тұста ескі мектепте қызмет істегендердің барлығы бірдей жаңа мектепке жұмысқа қабылданбайтындығы неге ескерілмеген, мәселені шешу жолдары бұған дейін неге қарастырылмаған деген орынды сауалдар пайда болады.
Жаңа оқу жылы пайдалануға берілетін мектепке директор болып Салтанат Сулыбекова тағайындалыпты. Ескі мектептің директоры Тұйғынай Күшенова мен оның қарамағындағылар өздерінің алдағы қызметі қалай болатындығын әлі білмейді. Оқу жылының басталуына санаулы ғана күндер қалды. Осы уақытқа дейін қарамағындағы қызметкерлерді алаңсыз жұмыс істей беруге, жаңа мектептердің біріне ұжым болып, оқушылармен бірге ауысамыз деп сендіріп келген директордың өзі де болашақ тағдырының беймәлімдігіне күйінеді. Мұғалімдер қазіргі уақытта оның сөзіне сенімсіздік танытып, өз беттерінше әрекеттерге бара бастаған.
Жамбыл ауданының әкімі Жандарбек Далабаев бірде-бір мұғалімнің жұмыссыз қалмайтынын, ауданда биылдың өзінде бес мектептің құрылысы жүріп жатқанын, барлығына орын табылатындығын айтты.
Облыс әкімінің орынбасары мектеп ұжымының айтқандарын тыңдай келе, мәселені дау-дамайсыз, оңтайлы шешу үшін өз араларынан мектеп директоры бастаған үш адамды сайлап, тиісті комиссиямен бірлесе жұмыс істеуді ұсынды. Сол жерде жағдайдың осыншалықты ушығуына жол берген тиісті лауазымды тұлғаларға нақты тапсырмалар беріп, мәселені кешіктірмей шешуді тапсырды. Расында, жаңа оқу жылының басталуына жарты ай қалғанда, тұтас бір мектептің ұжымының қыркүйекте қайда жұмыс істейтіндіктерін білмеуі аудан басшылары мен білім саласы жетекшілерінің өз міндеттеріне жүрдім-бардым қарайтындығын аңғартады. Дәл қазіргі кезде жұмыссыз қалудың соңы әлеуметтік дүмпуге әкеліп соқтырады. Сондықтан Қайназар мектебінде қалыптасқан күрделі жағдайдың күрмеуі дау-дамайсыз тарқатылады деген үміт үлкен.
Болат Абаған, Алматы облысы
