Студенттерді жатақханамен қамтамасыз ету шығындары 15 млрд теңгені құрайды – ҚР БҒМ
Бүгін "Нұр Отан" партиясы орталық аппаратында өткен жастарды қолдау туралы комиссия отырысында Білім және ғылым вице-министрі Бибігүл Асылова студенттер жатақханасына қажетті орын санын атады, деп хабарлайды BNews.kz тілшісі.Вице-минитсрдің мәліметінше, мемлекеттік білім беру тапсырысы бойынша студенттерді жатақханадағы орындармен қамтамасыз ету шығындары бүгінде 15 млрд теңгені құрайды. Ал үш жылдық бюджеттің 2019-2021 жылдары кезеңінде 45 мың жаңа орын ашу жоспарланып отыр.
"2017-2018 оқу жылының қорытындысы бойынша 139 316 оқушы мектеп бітірді. Оның 96 мыңы немесе 69 проценті ҰБТ тапсырса, 43 мыңы тестілеуден тыс қалды. 84 217 түлек еліміздегі ЖОО-ға оқуға түсті. Бұл ҰБТ тапсырғандардың 87 процентін құрайды. Ал колледжге 26990 адам қабылданды", - деді Асылова.
Оның айтуынша, жергілікті атқарушы органдар студенттердің өз өңірлерінде қалуы үшін, сондай-ақ шетелдік ЖОО-ға түсетін студенттер санын азайту үшін шаралар қабылдап отыр. Биыл әкімдер қосымша 1919 грант бөлген, оның 447 грантын ШҚО , Павлодар облысы – 221 грант, Атырау – 205 грант бөліп отыр. Мемлекет басшысының тапсырмасы бойынша қосымша 20 мың білім грантын бөлу талапкерлердің отандық ЖОО-ға түсу мүмкіндігін арттырды.
"Статистика бойынша, 8 мың адам Ресей Федерациясындағы ЖОО-ға түскен. Оның 5197-сі Ресей Федерациясы бөлген грант есебінде білім алады, ал 2808-і – ақылы түрде. Колледжге қабылданғандар саны – 598. Бұдан бөлек алыс-жақын шет мемлекеттердің оқу орындарына шамамен 3 мың адам қабылданды", - деп атап өтті Білім және ғылым вице-министрі.
Ол сыртқа білім іздеп кететін қазақстандықтар санын төмендету үшін мемлекеттік білім гранты санын көбейткеннен басқа қандай шаралар атқарылып отырғанын айтты.
"Студенттер тұратын жеріне жағдай жасап, білім сапасына назар аударуымыз қажет. Сапалы кадрлар даярлауға күш жұмсауымыз қажет. Министрлік осыған қатысты шаралар атқарып жатыр. ЖОО-да қызығушылық танытып отыр. "Атамекен" ұлттық кәсіпкерлер палатасымен бірлесе университеттер рейтингісі әзірленеді. Студенттер қауымдастығына, болашақ талапкерлерге айтамыз, министрлікте белгілі бір мамандықтар бойынша ЖОО рейтингісі бар. Жыл соңына дейін басқа да мамандықтар қатары толықтырылатын болады. Студенттер ЖОО рейтингісін көрген соң қайсысы жақсы, қайсысы сапалы білім бере алады, өздері ажырата білуі тиіс. Тағы бір мәселе, қазір ЖОО академиялық тәуелсіз, осыған сәйкес өздерінде бар ресурстар арқылы білім беру бағдарламаларының сапасын арттырып, қос диплом беру секілді өзгерістермен студенттерді қызықтыра алуы тиіс. Осындай шаралардан соң талапкерлер елімізде қалып, осында білім алатын болады", - деп сөзін түйіндеді ол.
