Жаныңда жүр жақсы адам...
Жақсылық күн секілді, кейде бұлт астына жоғалып, кейде сәулесін мол шашып, нұрын төгеді. Осындай жақсылық сәулесін шашып, мейірім шуағын төгіп тұратын жақсы адамдар менің қасымда өте көп. Олар: менің әкем мен анам, оқу-білімге үйреткен ұстаздарым, достарым, туған-туысқандарым. Олар маған үнемі жақсылық жасап, қиын кезде көмектесіп, өмірімнің мәнді де сәнді өтуіне септігін тигізуде. Осыған қарап, өмірде жақсы адамдар аз деп айта алмаймын. Ал, еліміз үшін халқымның қамын, бүгінгісі мен болашағын ойлап жүрген жақсы адам Елбасымыз Нұрсұлтан Әбішұлы Назарбаев. Ол кісінің жақсылығының арқасында осындай тыныш та бейбіт, бақытты күн кешудеміз. Ендеше, осындай жанымызда жүрген жақсы адамдардың қадірін біліп, құрметтеп, сыйлап жүрейік. Әрбір адамның қасында жақсы жанның жүруін тілеймін.
Шынында, күнделікті өмірде адам кімнің кім екенін де ескере де бермейді. Қарбаласқан тіршілік оны ойлап ескеруге де, елеуге де дес бермейді, көңіл бөлінбейді. Сондай жақсы жанның бірі - Жеткергенов Қаналы ағай. Бар ғұмырын ұстаздыққа арнаған Қаналы ағайдың да көктемі мен жазы, қыруар күзі жас ұрпақты тәрбиелеуге арналған. «Ұстазым менің ұстазым,өзіңмен өткен қыс, жазым» деген ыстық махаббат осындай ұлағатты ұстазға арналса керек.
1972 жылы мектепке тәрбиеші болып қабылданып, 1973-1975 жылдары Кеңес Армиясының қатарында қызмет етті. Әскерден кейін 1976 жылдан өзі оқып, білім алған Арал ауданындағы №73 орта мектепке қызметке қайта орналасады. Ол Қорқыт Ата атындағы Қызылорда гуманитарлық университетін «Биология» мамандығы бойынша 1980 жылы сырттай бітіреді. 1987 жылдан бастап өз пәнінен сабақ бере жүріп, түрлі басшылық қызметтерді атқарған. Атап айтар болсам, 1987-1997 жылдары мектеп директорының мектептен тыс жұмыстарды ұйымдастырушысы, 1997-2000 жылдары мектеп директорының оқу-тәрбие жұмысы жөніндегі орынбасары, 2000-2006 жылдар аралығында мектеп директоры, 2006 жылдан өз өтінішіне байланысты қосымша білім беру педагогі қызметіне ауысты.
Мектептегі түрлі іс-шаралар, жас ұстаздар, оқушыларға керекті жағдай, дұрыс білім беру сияқты көптеген шешілуге тиісті түйіні қиын істердің басы-қасында болып, ел қатарлы мектеп атану міндетін атқаруда Жеткергенов Қаналы ағайдың қажырлы еңбегі мен ұлтжанды ұлы қасиеті зор табыстарға жеткізіп еді. Қызмет істеген жылдары іс-тәжірибелері жергілікті, республикалық басылымдарда жарияланып отырды. Сол сияқты аудандық, облыстық педоқуларға қатысып, баяндамалар оқыды.
Ардақты ұстаз еңбегі еленіп, бұл күнде аудандық білім бөлімінің, облыстық білім басқармасының құрмет грамоталарымен марапатталып отырды.
Көп жылғы еңбегінің жемісі мен жеңісін көру – ол да бір ғанибет. Өзі білім берген көптеген шәкірттері бұл күнде еліміздің әр түкпірінде еңбек етіп, ел құрметіне бөленуде. Оқушылары жоғары оқу орындарын үздік бітіріп, әр түрлі салада еңбектенуде. Еңбегің жанды деген осы емес пе?!
Өнегелі де ардақты жан Жеткергенов Қаналы – үлгілі отбасының қамқоршысы. Отанасы — Орынкүлмен тату-тәтті өмір сүріп, алты перзентін ұяға қондырған бақытты ата-ана, бес-алты немерелі абзал жандар.
Бұл күндері Жеткергенов Қаналы ағай өзі білім алған мектебінде жұмыс істеуде. Биылғы жылы қыркүйектің он төртінші жұлдызында ұлағатты ұстазды өз ұжымы зейнеткерлікке шығарды.
Білім беру саласында 45 жыл танбай еңбек еткен жайдары да жайсаң ұстазға ұзақ ғұмыр, қажымас қайрат пен амандық тілеймін.
Бақыт Алдамжарова,
№73 орта мектептің мұғалімі
Қызылорда облысы,
Арал ауданы
